BAJETI YA SEREKALI HAITEKELEZEKI ... WASOMI BONGO "

  
WAZIRI WA FEDHA WA TANZANIA SAADA MKUYA SALUM ..

Bajeti ya Serikali ya 2015/16 inayoanza kujadiliwa bungeni leo huenda isitekelezeke kama inavyotarajiwa kutokana na changamoto za kisiasa zitakazoathiri ukusanyaji wa mapato.

Wataalamu wa masuala ya uchumi wamesema hayo katika hafla ya uchambuzi wa bajeti iliyoandaliwa na Kampuni ya Ukaguzi wa Hesabu ya KPMG na kuongeza kuwa Uchaguzi Mkuu na maandalizi hafifu ya baadhi ya vyanzo vya mapato yatasababisha Serikali kutotimiza malengo yake.

 

Profesa wa Uchumi kutoka Chuo Kikuu cha Mzumbe, Honest Ngowi alisema Uchaguzi Mkuu, hatima ya Kura ya Maoni, mbio za urais na matarajio ya Oktoba yatazorotesha kwa kiasi kikubwa utekelezaji wa bajeti hiyo.

“Hii ni bajeti ya sherehe ya kuagwa (send off) lakini pia ya fungate. Kwa kipindi hiki tulichopo wanasiasa hawatakubali wananchi wanyanyasike kulipa ushuru na kodi lukuki wakati ndiyo wapigakura wao.

“Tusitarajie kuona nidhamu ya utekelezaji wa bajeti kama tulivyozoea kwa sababu ya kubadilika kwa utawala,” alisema Profesa Ngowi.

Alisema katika kipindi hicho kutakuwa na ulegevu katika utumishi wa umma na taasisi zinazotakiwa kuikopesha Serikali zitakuwa zikisubiri kuona mabadiliko ya uongozi ili kujihakikishia usalama wa malipo yao.

Kuhusu mpango wa Serikali kutumia risiti za kielektroniki kuongeza mapato ya idara na Serikali za Mitaa, Profesa Ngowi alisema kuna wasiwasi wa taasisi kutokuwa na mashine za kutosha kufanikisha hilo.

“Kama hujajenga uwezo wa kufikia malengo ya kukusanya fedha hizo kwa nini unatishia kuwaadhibu?” alihoji huku akibainisha kuwa agizo la Serikali Kuu kwa Serikali za Mitaa kutotoa zabuni kwa kampuni zisizotumia EFD si la busara kwa kuwa mashine hizo bado zina mgogoro ambao haujapatiwa suluhu.

Meneja wa Kodi wa KPMG, Nsanyiwa Donald alisema hakuna mabadiliko makubwa katika mfumo wa kodi ikilinganishwa na mwaka 2014/15 zaidi ya kuongeza kodi katika mafuta ya petroli na kuanza kutumika kwa Sheria ya Kodi ya Ongezeko la Thamani (VAT) Julai.

Alipoulizwa iwapo kulikuwa na vyanzo vingine vya mapato badala ya kuongeza kodi katika mafuta, Donald alisema Serikali ilikuwa na uwezo wa kuachana na kodi hiyo na kuanzisha tozo kwa wamiliki wa nyumba.

Bajeti hiyo ya Sh22.4 trilioni ambayo inaanza kujadiliwa leo, inaweza kupata changamoto za wabunge kutokana na kutopatikana kwa fedha zinazotengwa kwa ajili ya kukamilisha au kuanzisha miradi mbalimbali ya maendeleo.

Kabla ya kuanza uchambuzi huo, Waziri Kivuli wa Fedha, James Mbatia atawasilisha Bajeti ya Kambi ya Upinzani.