PINDA AWAKINGA WASIOLIPA ADA VYOUNI .... NI TOKA MPANGO WA SASA WA SEREKALI WA KKK DODOMA .

Serikali imeviagiza vyuo vya elimu ya juu nchini kutowazuia wanafunzi wake kufanya mitihani hata kama hawajalipia ada, badala yake washikilie vyeti vyao hadi pale watakapolipa fedha wanazodaiwa. 

Waziri Mkuu, Mizengo Pinda alitoa agizo hilo alipozindua mpango wa Serikali wa kukuza stadi za Kusoma, Kuandika na Kuhesabu (KKK) katika Chuo kikuu cha Dodoma juzi.

Alisema Serikali itakuwa haitendi haki kwa wananfunzi wake ambao wamesoma kwa kipindi cha miaka mitatu mfululizo na mwisho wake wakazuiwa kufanya mitihani ya kumaliza chuo kwa sababu za kukosa ada.

Pinda alimwagiza Katibu Mkuu wa Ofisi ya Waziri wa Nchi, Ofisi ya Waziri Mkuu, Tawala za Mikoa na Serikali za Mitaa (Tamisemi), Sifuni Mchome kuviandikia  barua vyuo hivyo ili wanafunzi wasizuiwe kufanya mitihani.

“Kuna baadhi ya wanafunzi kutokana na matatizo ya kwenye familia zao hukosa fedha za kufanyia mtihani, kwa hiyo tuwazuie eti kwa sababu tu hawajalipa ada? Hapana, tutakuwa hatuwatendei haki vijana wetu ambao wamejitahidi kusoma kwa miaka mitatu na mwisho wake wakose kufanya mitihani.

Kuhusiana na  mpango wa KKK, Pinda alisema ni ni mzuri kama utasimamiwa vizuri kwani unaweza kuleta matokeo mazuri katika mfumo wa elimu nchini. Alisema mpango huo unatakiwa kusimamiwa na Serikali Kuu ambao ni watunga sera na Serikali za Mitaa ambako ndipo kuna shule za chekechea, msingi na sekondari.

Naibu Waziri wa Tamisemi (Elimu), Kassim Majaliwa alisema mpango wa KKK ni lazima utawafikia wakuu wa mikoa, watendaji wa halmashauri na madiwani ili iwe ni ajenda yao ya mara kwa mara.

Mpango wa KKK ni wa mwaka 2014/16 na unatekelezwa katika shule zote za misingi kwa watoto walioko darasa la kwanza na la pili.