TANZANIA YA LEOZAIDI YA UIJUAVYO .. ETI WANAOTAKIWA KUPAMBANA NA RUHWA NDIO WAMEKITHIRI KWA RUHWA .. DUH! ( TAKUKURU )

Dar es Salaam. Taasisi ya Kuzuia na Kupambana na Rushwa (Takukuru) imetajwa katika utafiti kuwa ni kati ya taasisi zilizoshika nafasi za juu kwa kupokea rushwa katika kipindi cha miaka 10 iliyopita.

Utafiti huo unaoitwa ‘Baada ya muongo mmoja wa kupambana na rushwa, tumepiga hatua kiasi gani?’ umefanywa na Taasisi ya Afrobarometer ya Dar es Salaam kwa kushirikiana na Repoa na ulifanyika kati ya Agosti 26 hadi Septemba 29, 2014 kwa kuwahoji watu 2,386 kutoka Tanzania Bara na Visiwani.

Utafiti huo umeutaja mwaka 2014 kuwa ndiyo uliokuwa kinara wa matukio ya rushwa katika kipindi cha miaka 10 iliyopita huku asilimia nyingi zikiwataja maofisa wa Takukuru kujihusisha na vitendo hivyo.

Akizindua matokeo hayo, Mkurugenzi wa Elimu kwa Umma wa Takukuru, Mary Mosha alisema taasisi hiyo inanyooshewa kidole kwa kuwa wananchi wanataka kuona kila anayetuhumiwa anafikishwa mahakamani.

“Mambo yanafanyika lakini hayawafikii watu wa chini. Walipenda kusikia fulani kapelekwa mahakamani. Watu wanaweza kusema taasisi fulani kuna rushwa kwa sababu kuna vitu fulani havijafanyika,” alisema Mosha.

Hata hivyo, mkurugenzi huyo alisema kama utafiti huo ungefanyika Oktoba mwaka jana, anaamini matokeo yangekuwa tofauti kwa namna taasisi hiyo ilivyolishughulikia suala la uchotwaji fedha kwenye Akaunti ya Tegeta Escrow.

Mhadhiri Mwandamizi wa Chuo Kikuu cha Dar es Salaam (UDSM), Dk Benson Bana alisema baadhi ya watu wanailaumu Takukuru bila kufikiri kuwa taasisi hiyo haina nguvu ya kisheria ya kutekeleza mambo inayotaka.

“Pia nendeni kwenye vyama vya siasa chunguzeni namna wanavyojikusanyia fedha kwa ajili ya uchaguzi, angalieni na sekta binafsi. Kuondoa rushwa nchini hii inahitajika nguvu ya umma,” alisema Dk Bana.

Matokeo ya utafiti huo yamebainisha kuwa asilimia 64 ya wananchi waliohojiwa walisema kuwa rushwa inazidi kuongezeka nchini.

Ripoti hiyo iliyotolewa na mtafiti kutoka Repoa, Rose Aiko inaeleza kuwa asilimia 29 ya wananchi waliohojiwa walisema kuwa maofisa Takukuru wanapokea rushwa ikiwa ni ongezeko la asilimia moja ikilinganishwa na matokeo ya utafiti kama huo uliofanywa mwaka 2012.

“Mambo yameongezeka, mwaka 2014 ulivunja rekodi ingawa kuna hatua zinaonyesha kuchukuliwa lakini hali inaonekana kubaki vilevile,” alisema Aiko.

Matokeo ya utafiti huo pia yanaonyesha kuwa asilimia 50 ya waliohojiwa wanasema kuwa Polisi inaongoza kwa kupokea rushwa nchini wakati maofisa wa Mamlaka ya Mapato Tanzania (TRA) wanafuatia wakiwa na asilimia 37, majaji na mahakimu asilimia 36, huku maofisa wa Serikali za Mitaa wakipata asilimia 25.