LUBUVA AWATOA HOFU WAPIGA KURA BONGO ....>>>>

  

Mwenyekiti wa Tume ya Taifa ya Uchaguzi (NEC), Jaji Damiani Lubuva amesema kwamba, kazi ya uandikishaji wa Daftari la Wapigakura inaendelea vizuri hivyo wananchi wasiwe na hofu.

Pia, aliwataka wananchi wa mikoa ya Kilimanjaro, Arusha, Shinyanga, Manyara na Mara kujitokeza kwa wingi kujiandikisha kwenye daftari hilo Juni 9.

“Nimezunguka mikoa ya Singida na Dodoma zoezi hilo linaendelea vizuri, sasa nashangaa watu wanasema linasuasua jamani haya maneno mnayatolea wapi acheni tume ifanye kazi yake,” alisema Lubuva.

Jaji Lubuva alisema kwamba watu wanashindwa kujua kwamba NEC imefanya uchunguzi wa kutosha kuhusu muda wa uandikishaji wa daftari hilo na kubaini kwamba muda unatosha kwani ifikapo mwisho wa Julai na mwanzoni mwa Agosti kazi hiyo itakuwa imemalizika.

Alisema wananchi wajitokeze kwa wingi kujiandikisha kwenye daftari hilo ili wasije wakakosa haki yao ya msingi ya kupiga kura kwenye Uchaguzi Mkuu unaotarajiwa kufanyika Oktoba 25.

Mchambuzi mwandamizi wa Kompyuta wa Tume ya Taifa ya Uchaguzi (NEC), Joseph Mally alisema wananchi wa mikoa ya Lindi, Mtwara, Iringa na Njombe wamefanikisha kazi hiyo kwa asilimia 100 kwani walijitokeza ipasavyo na kuwahimiza wakazi wa Kanda ya Kaskazini kuiga hilo.

Mally alisema wananchi wa mikoa ya kusini na Njanda za Juu Kusini walitumia ipasavyo haki yao kwa kujitokeza kwa wingi kuhakikisha wanajiandikisha kwenye Daftari la Wapigakura.

Mkuu wa Mkoa wa Manyara, Dk Joel Bendera alisema mafunzo waliyopatiwa watendaji wa wilaya za mkoa huo yatahusisha ujazaji wa fomu zitakazotumika kwenye uandikishaji huo wa wapiga kura kwa kutumia BVR.

“BVR ni kifaa cha kisasa kinachoandikisha kwa kutumia kompyuta na kuchukua alama za vidole, saini na upigaji picha kwa ubora wa hali ya juu ili kuondoa uwezekano wa wapiga kura kujiandikisha zaidi ya mara moja,” alisema Dk Bendera.

Alisema watakaoandikishwa ni wananchi wote wenye umri wa miaka 18 na kuendelea na ambao hawakuwahi kuandikishwa ikiwa ni pamoja na wale watakaotimiza umri wa miaka 18 ifikapo siku ya uchaguzi Oktoba mwaka huu.

“Wananchi wa mikoa ya kanda ya kaskazini hususan wa Mkoa wa Manyara wanatakiwa nao wajitokeze kwa wingi kujiandikisha kwani kwa kushirikiana na wakurugenzi wa wilaya vifaa vitawafikia wote,” alisema Mally.

Hata hivyo alisema walikabiliwa na tatizo la umbali mrefu kutokana na jiografia ya mikoa ya kanda ya kusini na nyanda za juu kusini kwenye baadhi ya sehemu hivyo kusambaza vifaa kwa zaidi ya siku moja hadi kufikia maeneo yote.